Сѐ што треба да знаете за SPF (Sun Protection Factor)

Сѐ што треба да знаете за SPF (Sun Protection Factor)

Што е SPF?

SPF, или Sun Protection Factor, е мерка за тоа во колкав степен препаратот за сончање ќе ја заштити кожата од UVB зраци, вид сончева радијација која предизвикува изгореници, ја оштетува кожата и може да придонесе за развивање рак на кожата. Редовната употреба на препарати за сончање со SPF15 го намалува ризикот за развивање сквамозен карцином за 40%, а меланом за 50%.

Факторот всушност означува колку подолго време ќе им биде потребно на UVB зраците да продрат во кожата и да предизвикаат црвенило, во споредба со истото време без препарат за сончање.

Факторот се пресметува преку делење на дозата сончева радијација потребна за поцрвенување на кожата (стручно, еритем доза) со нанесен препарат за сончање и дозата за поцрвенување без нанесен препарат:

SPF = доза на радијација за поцрвенување со препарат / доза на радијација за поцрвенување без препарат

Ако Вашата кожа нормално гори по 10 минути директна изложеност на сонце, нанесувањето препарат за сончање со фактор SPF15 ќе Ви овозможи да останете изложени на сонце без горење приближно 150 минути (факторот означува 15 пати подолго). Ова е груба проценка која сепак зависи од видот на кожа, интензитетот на сончева светлина и количината препарат за сончање која се нанесува. SPF е всушност мерка за нивото на заштита при изложеност на UVB и не треба да се користи за одредување на времетраењето на сончање.  

Напомена: SPF не означува заштита од UVA зраците, кои се исто така штетни и опасни.

За најдобра заштита, дерматолозите препорачуваат користење на препарат за сончање со минимум SPF15, кој се нанесува по 2 милиграми на кубен центиметар кожа, или од прилика 30-тина грами за целосно покривање на телото, кои треба да се нанесуваат повторно на секои 2 часа, а во вода на секои 40 минути. Тоа значи дека на четиричлено семејство ќе им бидат потребни околу 200 грами препарат за сончање дневно – практично цело пакување!

Мнозинството луѓе не ставаат доволно препарат за сончање и нанесуваат само една четвртина или една половина од потребната количина. Со таков начин на употреба, заштитата е само квадратен корен од SPF, па на пример половично нанесување препарат за сончање со SPF30 ќе пружи ефективна заштита еднаква на само 5.5!

SPF скалата не е линеарна:

  • SPF15 блокира 93% од UVB зраците   
  • SPF30 блокира 97% од UVB зраците
  • SPF50 блокира 98% од UVB зраците
Па така, еден начин за гледање на работите е дека SPF30 Ви дава само 4% повеќе заштита во однос на SPF15.

Друг начин за гледање на работите е следниов:

  • SPF15 (93% заштита) пропушта 7 од 100 фотони
  • SPF30 (97% заштита) пропушта 3 од 100 фотони
На тој начин, иако нивото на заштита реално не е дуплирано, SPF30 всушност ќе блокира двојно повеќе радијација во споредба со SPF15.

А зошто не би користеле уште повисок Sun Protection Factor?

Препаратите за сончање со многу висок SPF, на пример SPF75 или SPF100, не пружаат значително повисока заштита во однос на SPF30 и погрешно ги наведуваат луѓето дека се на некој начин подобро заштитени. Дополнително, со цел да се добие потполна заштита од целиот спектар на ултравиолетови зраци, UVA заштитата треба да биде најмалку 1/3 од UVB. Препаратите за сончање со висок SPF вообичаено нудат многу поголема UVB отколку UVA заштита, што дава лажно чувство на сигурност.

Совет:

Консултирајте се со Вашиот фармацевт за препарати на кои е наведено дека пружаат широк спектар на заштита (UVA и UVB)

UVB предизвикува црвенило на кожата, додека UVA не. Како и да е, UVA може да придонесе за стареење на кожата, вклучително и појава на брчки и т.н. старечки флеки. UVA и UVB го зголемуваат ризикот за рак на кожата.

Користењето препарат за сончање, во комбинација со други мерки за претпазливост како што се носењето соодветна облека (со долги ракави), шапка, очила за сонце и избегнување на пладневното сонце во зенит, можат да спречат развивање рак на кожата. На лето, најдобро е да се избегнува директната изложеност на сонце во периодот од 10 до 16 часот, кога зрачењето е најинтензивно. Количината соларна енергија која допира до нас за само 15 минути во 13 часот е еднаква на истата за времетраење од 1 час во 9 часот наутро. Со други зборови, кога сонцето е високо на хоризонтот, изложеноста е 4 пати поголема. Бебињата под 6 месеци возраст не треба да се изложуваат на директна сончева светлина!

Совет:

Нанесете го препаратот за сончање 15 минути пред да се изложувате на сонце.

Што значи таканаречениот UV индекс

  • 0 до 2: зелено – не се потребни мерки за претпазливост
  • 3 до 7: портокалово – барајте сенка на средина од денот, користете препарат за сончање, носете соодветна облека со долги ракави, шапка и очила за сонце
  • 8 до 10: црвено – барајте сенка и избегнувајте да се движите на отворено во средина од денот. Долгите ракави, препаратите за сончање, шапката и очилата за сонце се задолжителни
  • 11: виолетово – незаштитената кожа и очи можат да изгорат за само неколку минути

Совет:

Активните состојки во препаратите за сончање делуваат така што или ги разбиваат ултравиолетовите зраци (физичко дејство), или ги апсорбираат (хемиско дејство). Погледнете дали во составот на препаратите за сончање ги има следниве состојки

  • Aminobenzoic acid
  • Avobenzone
  • Cinoxate
  • Dioxybenzone
  • Homosalate
  • Meradimate
  • Octocrylene
  • Octinoxate
  • Octisalate
  • Oxybenzone
  • Padimate O
  • Ensulizole
  • Sulisobenzone
  • Titanium dioxide
  • Trolamine salicylate
  • Zinc oxide

Конечна напомена

Иако UVB е штетно јонизирачко зрачење, тоа истовремено има и клучна улога за природното создавање витамин Д3 во кожата, така што имајте во предвид дека високиот SPF во помал или поголем степен го попречува овој процес и на тој начин го остава организмот со количини кои се помали од дневно потребните за нормално функционирање на организмот.  

Д-р Стојан Николиќ

Консултант за бизнис развој

Модерм Маркетинг

Кликнете на сликата за да ја посетите нашата Facebook страница и да се информирате за неверојатниот попуст на препарати од Uriage со најразличен SPF од 08 до 21.06.